Trátase da 16ª edición da campaña “Outono Gastronómico”, na que participan 73 casas rurais das catro provincias galegas, que ofrecerán, entre o 16 de setembro e o 18 de decembro, dous menús diferentes deseñados especificamente para a campaña, que incluirán na súa composición produtos galegos con certificación de calidade. Dos 73 establecementos rurais participantes, 22 atópanse na provincia da Coruña, 19 en Lugo, 17 en Ourense e 15 en Pontevedra.

No acto de presentación intervirá o director da Casa de Galicia, Juan Serrano, e a directora de Turismo da Xunta de Galicia, Nava Castro, que detallará os aspectos máis relevantes desta edición.

A relevancia vén dada, tanto por parte dos locais colaboradores como do público que, ano a ano, participa nesta difusión da oferta turística galega ao redor do ámbito rural, da que ata o de agora xa se beneficiaron máis de 77.615 persoas.

Así mesmo, esta cita é unha gran oportunidade para a promoción de produtos singulares da gastronomía de Galicia así como das 5 denominacións de orixe dos viños e os licores tradicionais da comunidade autónoma.